ចៅសង្កាត់ សាលាកំរើក បានបង្ហោះរូបភាពប៉ុន្មានសន្លឹក ភ្ជាប់ជាមួយសម្ដីប៉ុន្មានឃ្លាគួរឲ្យសង្វេគ ព្រោះលោកបានបញ្ជាក់ថា តាំងពីប្រកាសចូលកាន់តំណែង ដល់ពេលនេះ មិនទាន់បានបន្ទប់ធ្វើការបម្រើសេវាជូនប្រជាពលរដ្ឋឡើយ ដោយសារចៅសង្កាត់ចាស់ចាក់សោបន្ទប់ជាប់។
ចៅសង្កាត់ វ័យ ២៦ឆ្នាំ ជិន សុខង៉េង បានសរសេរថា៖ “តាំងពីការប្រកាសចូលកាន់តំណែង រហូតមកដល់ព្រឹកថ្ងៃច័ន្ទនេះ ខ្ញុំចៅសង្កាត់ថ្មីសាលាកំរើក មិនទាន់មានបន្ទប់ធ្វើការសម្រាប់បម្រើសេវាជូនពលរដ្ឋនៅឡើយទេ ក៏ព្រោះតែបន្ទប់អតីតចៅសង្កាត់ធ្លាក់ឆ្នោត ត្រូវបានចាក់សោរ មិនឲ្យចៅសង្កាត់ ថ្មីចូលធ្វើការងារ។
សកម្មជន CNRP រូបនេះបានទទួលត្រាចៅសង្កាត់ ក្នុងការប្រកាសចូលកាន់តំណែងចៅសង្កាត់សាលាកំរើកជាផ្លូវការកាលពីថ្ងៃទី៧ ខែកក្កដា ដោយមានអ្នកចូលរួមអបអរសាទរយ៉ាងច្រើនកុះករ ហើយពេលនេះកំពុងបំពេញការងារក្រៅបន្ទប់ ដោយសារមានប្រជាពលរដ្ឋជាច្រើនកំពុងស្វែងរកសេវាសាធារណៈ៕
