មើមយិនស៊ិនត្រូវបានជនជាតិចិនប្រើប្រាស់ជាយូរមកហើយក្នុងលក្ខណៈជាថ្នាំដាស់ឱ្យមានសម្រើបតណ្ហា ។ ប៉ុន្តែតាមការរកឃើញរបស់ក្រុមអ្នកវិទ្យាសាស្ត្រកូរ៉េខាងត្បូងបានបង្ហាញឱ្យឃើញនូវអត្ថប្រយោជន៍ថ្មីមួយបន្ថែមទៀតរបស់យិនស៊ិននោះគឺជួយបុរសដែលជួបបញ្ហាអសមត្ថភាពផ្លូវភេទ (លិង្គមិនងើប) ឲ្យរីករាយក្នុងជីវិតសិចវិញបាន ។
ការសិក្សាមួយដែលធ្វើឡើងដោយពួកអ្នកវិទ្យាសាស្ត្រសាកលវិទ្យាល័យឱសថសាស្ត្រប្រទេសកូរ៉េខាងត្បូង Yonsei University College បានរកឃើញថា បុរសដែលមានបញ្ហាលិង្គមិនងើបទទួលបានភាពរីករាយជាថ្មីនៃជីវិតនៅលើគ្រែរបស់ពួកគេបន្ទាប់ពីលេបថ្នាំចម្រាញ់ពីមើមយិនស៊ិនតែ២-៣សប្តាហ៍ប៉ុណ្ណោះ។ នេះអាចជាលទ្ធផលដែលគួរឱ្យជឿជាក់មួយ ដ្បិតការសិក្សាពិសោធន៍ថ្មីនេះបានធ្វើទៅលើបុរស១១៩នាក់ ដែលសុទ្ធតែមានបញ្ហាលិង្គមិនងើបរឹងពោលគឺមិនកើតចេញពីលទ្ធផលពិសោធន៍លើសត្វកណ្តុរដូចការសិក្សាមុនៗឡើយ ។
នៅក្នុងរបាយការណ៍ស្តីពីគំហើញរបស់ខ្លួន ក្រុមអ្នកស្រាវជ្រាវបាននិយាយថា ឱសថចម្រាញ់ពីយិនស៊ិនរបស់កូរ៉េបានធ្វើឱ្យល្អប្រសើរនូវមុខងារផ្លូវភេទគ្រប់ផ្នែកទាំងអស់ ។ វាអាចត្រូវបានប្រើជំនួសថ្នាំពេទ្យដើម្បីកែលំអជីវិតសិចរបស់បុរស ។
លិង្គមិនងើបអាចកើតមានលើបុរសពេលណាមួយក៏បាន ប៉ុន្តែវារឹតតែសាមញ្ញចំពោះបុរសដែលមានវ័យចាប់ពី៤០ឆ្នាំឡើងទៅ ។ បុរសពាក់កណ្តាលក្នុងវ័យនេះតែងជួបបញ្ហាលិង្គមិនងើប ។ មូលហេតុចម្បងនៃបញ្ហានេះគឺបណ្តាលមកពីលំហូរឈាមទៅកាន់លិង្គមិនបានគ្រប់គ្រាន់ ៕
