បណ្តាញសង្គមហ្វេសប៊ុកបានប្រកាសបន្ថែមមុខងារពិសេសថ្មីមួយទៀតសម្រាប់អ្នកប្រេះឆាស្នេហា ពោលគឺការកំណត់រវាងអ្នកដែលធ្លាប់មានចំណងសេ្នហាជាមួយគ្នា ។ មានន័យថារវាងពួកគេទាំងពីរអាចដឹងរឿងរ៉ាវតិចបំផុតពីព័ត៌មានផ្ទាល់ខ្លួនដែលមានលើគណនី (Account) ។
ក្រុមហ៊ុនបានអះអាងថា ខ្លួននឹងផ្តល់កំណែប្រែនេះនៅអាមេរិកជាមុនសិន ក្រោយពេលធ្វើសម្រាប់មនុស្សទូទាំងពិភពលោកដែលប្រើប្រាស់ហ្វេសប៊ុក ។ ការបន្ថែមមុខងារនឹងកាន់តែធ្វើឱ្យមនុស្សពីរនាក់ដែលធ្លាប់មានមនោសញ្ចេតនាជាមួយគ្នាលើបណ្តាញសង្គម និងងាយស្រួលលាក់ពីការបង្ហោះរឿងរ៉ាវ ថ្មីៗ (Post) ។ នេះបើសិនជាពួកគេមិនទាន់ឈប់រាប់អានគ្នា (Unfriend) ។
ក្រុមហ៊ុនហ្វេសប៊ុកនិយាយថា «យើងធ្វើដូច្នេះមិនចង់ឱ្យភាគីទាំងសងខាងមានកំហឹង ឬការមិនពេញចិត្តរវាងរឿងបុគ្គល តែបែរជាបញ្ចេញលើគណនីរបស់គេ ហើយចាត់ទុកថា ហ្វេសប៊ុកគឺជាកន្លែងសមរភូមិវាយប្រហារពាក្យសម្តី ឬបង្ហោះវីដេអូឆ្លើយឆ្លងគ្នា ខណៈមនុស្សរាប់រយនាក់ទៀតដឹងពីស្ថានភាពរបស់គេតំណាលគ្នានោះ ។ លើសពីនេះទៅទៀត ពេលពួកគេមានមានបញ្ហាជាមួយគ្នា តែងតែចុចលើប៊ូតុង ឈប់រាប់អាន (Unfriend) ឬបិទគណនីរបស់គេ (Block) ជាដើម» ។
ហ្វេសប៊ុកគឺជាកន្លែងប្រមូលផ្តុំដោយព័ត៌មានយ៉ាងសម្បូរបែប ដែលមានមនុស្សផ្តល់ព័ត៌មានពីច្រើនប្រភពដែលពួកគេបានដឹង និងចង់ចែករំលែក ។ មនុស្សមួយចំនួនក៏បានស្វែងរកដៃគូរលើបណ្តាញសង្គមមួយនេះ តែនៅពេលដែលចំណងស្នេហ៍បានបញ្ចប់ ពួកគេតែងតែជួបបញ្ហាជារឿយៗ មិនដឹងថាត្រូវធ្វើយ៉ាងណាក្រៅពីប្រើប្រាស់ដំណាក់កាលចុងក្រោយគឺ Unfriend និង Block ជាដើម ៕