ដោយ៖ ថ្មីៗ
អ្នកនយោបាយសុទ្ធតែត្រូវការអំណាច។ អ្នកទាំងអស់នោះអាចភូតភរ បោកបញ្ឆោតប្រជាពលរដ្ឋបាន តែមិនអាចភូតភរបោកប្រាស់ខ្លួនឯងបានឡើយ។ ក្នុងពាក្យប្រជាប្រិយគេតែងនិយាយថា ខ្លឹមនៃស្កគឺផ្អែម ខ្លឹមនៃអំបិលគឺប្រៃ ខ្លឹមអ្នកនយោបាយគឺអំណាច។ ដូច្នេះប្រឡូកក្នុងវិស័យគណបក្សនយោបាយថាមិនត្រូវការអំណាច វាជាការភូតកុហក។
សម្រាប់ប្រទេសកម្ពុជាដែលប្រកាន់របបលទ្ធិប្រជាធិបតេយ្យសេរីពហុបក្ស ប្រជាពលរដ្ឋមានសិទ្ធិសេរីភាពក្នុងការបង្កើតគណបក្សនយោបាយបាន ដូចជាក្នុងរដ្ឋធម្មនុញ្ញនៃព្រះរាជាណាចក្រកម្ពុជាបានចែងក្នុងមាត្រា៤២ ។ ដោយយោងកត្តានេះ មានប្រជាពលរដ្ឋចូលរួមបង្កើត គណបក្សនយោបាយសារជាថ្មី ចាប់តាំងពីឆ្នាំ១៩៩៣មកម្លេះ ។
ការចូលរួមក្នុងសកម្មភាព ឬជីវភាពជាអ្នកលេងគណបក្សនយោបាយ (Politician Game) គឺជាការលះបង់មួយយ៉ាងធំក្នុងការចូលរួមជួយប្រជាពលរដ្ឋនិងប្រទេសជាតិឲ្យរស់នៅបានសន្តិភាពនិងសុភមង្គល។ ក៏ប៉ុន្តែសកម្មភាពជាអ្នកលេងគណបក្យនយោបាយ នឹងបង្កជាគ្រោះកាចសម្រាប់ប្រជាពលរដ្ឋ និងប្រទេសជាតិវិញ បើល្គឹកណាអ្នកលេងគណបក្សនយោបាយណាពុំមានបេះដូងល្អពិតប្រាកដក្នុងការបម្រើប្រជាពលរដ្ឋនិងប្រទេសជាតិដោយឃ្លាតចាកពីគោលការណ៏ សីលធម៌របស់អ្នកនយោបាយមួយៗ ដែលបានចែងក្នុងការឃោសនាផ្សព្វផ្សាយពីគោលនយោបាយរបស់បក្សខ្លួន។
យើងទាំងអស់គ្នាត្រូវដឹងថា បង្កើតគណបក្សនយោបាយ គឺដើម្បីឆ្ពោះទៅកាន់អំណាចចាត់ចែង ដឹកនាំប្រទេសជាតិដែលគេតែងហៅថា អំណាចនយោបាយ។ ព្រោះក្នុងរដ្ឋនីមួយៗ បើអំណាចនយោបាយមានលក្ខណៈល្អ គឺប្រជាពលរដ្ឋនិងប្រទេសជាតិមានសុខសន្តិភាព និងសម្បូរសប្បាយ ផ្ទុយមកវិញបើអំណាចនយោបាយមានបញ្ហាមិនល្អ ប្រជាពលរដ្ឋ និងប្រទេសជាតិក៏កើតមានទុក្ខលំបាកវេទនា និងរងប៉ះពាល់ចុះខ្សោយលើគ្រប់វិស័យផងដែរ។
ក្នុងប្រវត្តិសាស្ត្រកម្ពុជា ក៏ដូចប្រទេសមួយចំនួនក្នុងពិភពលោក អំណាចនយោបាយជួបគ្រោះថ្នាក់ដែលបណ្ដាលមកពីអ្នកលេងនយោបាយបង្កឡើង។ គេតែងសង្កេតឃើញថាអ្នកលេងគណបក្សនយោបាយដែលមានឧត្តមគតិល្អ និងសកម្មភាពល្អតែងតែដឹកនាំអំណាចនយោបាយអោយមានការរីកចម្រើនជាលំដាប់សម្រាប់ប្រជាពលរដ្ឋ និងប្រទេសជាតិដូចជាការលើកឡើងទស្សនវិទូក្រិក គឺលោកអារីស្តូត ដែលនិយាយថា នយោបាយជាការរស់នៅក្នុងសុភមង្គលសម្រាប់ប្រជាពលរដ្ន និងសង្គមទាំងមូល។
ផ្ទុយមកវិញ បើចូលរួមបង្កើតគណបក្សនយោបាយដើម្បីផលប្រយោជន៍ផ្ទាល់ខ្លួន ឬបក្សពួកខ្លួននោះ គឺប្រាស់ចាកទាំងស្រុងនូវខ្លឹមសារល្អរបស់គណបក្សនយោបាយ។ អ្នកលេងនយោបាយបែបនេះគេត្រូវដាក់ឈ្មោះថា ជាអ្នកជួញគណបក្សនយោបាយវិញទើបស័ក្តសម។ ត្រូវចងចាំថា បើមានជំពូកក្រុមអ្នកជួញគណបក្សនយោបាយច្រើនកាលណា គឺគ្មានទេសន្តិភាព គ្មានទេការអភិវឌ្ឍន៍ និងគ្មានទេសុភមង្គលសម្រាប់ប្រជាពលរដ្ឋ និងប្រទេសជាតិ។
សរុបមក ការចូលរួមបង្កើតគណបក្សនយោបាយជាសិទ្ធិសេរីភាពមែន តែគេមិនអាចយកសេរីភាពនេះមកធ្វើជាល្បែង ដោយសារគ្រាន់តែប្រកាន់នូវទស្សនៈថា ខ្លួន និងក្រុមខ្លួន មានឧត្ដមគតិល្អស្រឡាញ់ ប្រជាពលរដ្ឋ និងប្រទេសជាតិ ហើយនាំគ្នាអនុវត្តសកម្មភាពផ្សេងៗទៅតាមយុទ្ធសាស្ត្ររបស់ខ្លួនទាំងងងឹតងងុល ហើយដែលសកម្មភាពយុទ្ធសាស្ត្រទាំងនោះត្រូវបានគេសង្កេតឃើញថា វាកំពុងតែបង្កមហន្តរាយដល់ប្រជាពលរដ្ឋ និងប្រទេសជាតិនោះទេ។
ជំពូកអ្នកលេងគណបក្សនយោបាយមួយចំនួន ដើម្បីចង់ឈ្នះឈានទៅកាន់អំណាចពួកគេនឹងមិនខ្លាចឡើយនួវល្បិចកិចកលក្នុងការយកប្រជាប្រិយភាពពីប្រជាពលរដ្ឋទោះជាប្រទេសជាតិត្រូវជួបវិបត្តិពេលបច្ចុប្បន្ននិងអនាគតយ៉ាងណាក្ដី។ ផ្ទុយទៅវិញ ប្រសិនជារាល់អ្នកលេងនយោបាយទាំងអស់ ប្រកួតប្រជែងគ្នាដើម្បីកាន់អំណាចចក្នុងផលប្រយោជន៍ប្រទេសជាតិ វានឹងមិនអាចកើតឡើងទេទំនាស់នយោបាយ ហើយបើទោះជាកើតមានទំនាស់នយោបាយ គេក៏មានលទ្ធភាពដោះស្រាយបានដែរ៕
(ដោយសាស្ត្រាចារ្យ អ៊ិត សាន)