អ្នកវិទ្យាសាស្ត្រទើបរកឃើញប្រភេទមេរោគដែលមានអាយុកាល ៣,៥ លានឆ្នាំ នៅតំបន់ស៊ីប៊ីរី។ គេបានរំពឹងគិតថា វានឹងជួយបង្កើនអាយុ ព្រមទាំងប្រព័ន្ធការពាររាងកាយរបស់មនុស្ស។
តាំងពីយូរយារមកហើយ ដែលមនុស្សមាននូវសុបិន្តពីឱសថទេព អាចធ្វើឲ្យគេមានជីវិតអមតៈបាន។ ថ្មីៗនេះ អ្នកវិទ្យាសាស្ត្ររុស្ស៊ីបានប្រកាសថា គេបានបោះ១ជំហានទៅមុខ ដោយការរកឃើញនូវមេរោគ "អមតៈ" មួយហៅថា Bacillus F អាចកែសម្រួលជីវិតរបស់មនុស្សបាន។
តាមការទម្លាយប្រាប់របស់អ្នកវិទ្យាសាស្ត្រនោះ គឺពួកគេបាន "បើកសោរ" DNA នៃសមត្ថភាពអង្គបដិបក្ខ ហើយកំពុងសិក្សាស្វែងយល់ពីវិធីដែលហ្សែនទាំងនេះ ជួយឲ្យមេរោគ Bacillus F រស់នៅបានយ៉ាងអស្ចារ្យ ក្នុងស្រទាប់ទឹកកកអមតៈនាតំបន់ស៊ីប៊ីរី។ ការពិសោធន៍លើសភាវៈមានជីវិត ពិសេសគឺ បណ្តាកោសិកាឈាមរបស់មនុស្ស កណ្តុរ រុយ សុទ្ធសឹងផ្តល់នូវលទ្ធផលជាវិជ្ជមាន។
ការពិសោធន៍ឲ្យដឹងថា នៅលើសត្វ ពិសេសបណ្តាកោសិកាឈាមរបស់មនុស្ស វាមានឥទ្ធិពលសកម្ម១។ ប៉ុន្តែ នៅមានកិច្ចការច្រើនទៀត ត្រូវបំពេញបន្ថែម ដើម្បីស្វែងរកឋាមពល របស់មេរោគនេះ
សាស្ត្រាចារ្យ Sergey Petrov ប្រធានក្រុមស្រាវជ្រាវនៃមហាវិទ្យាល័យ Tyumen ឲ្យដឹងថា "ក្នុងចំណោមការពិសោធន៍ត្រូវបានអនុវត្ត នោះមេរោគ Bacillus F វារំញោចនូវកំណើន ក៏ដូចជាការបង្កើនប្រព័ន្ធការពារសរីរាង្គ"។
មេរោគ Bacillus F ត្រូវបានរកឃើញនាឆ្នាំ ២០០៩ ដោយបណ្ឌិត Anatoli Brouchkov ប្រធានមហាវិទ្យាល័យ Geocrylogy នៃសកលវិទ្យាល័យម៉ូស្គូ។ វាបានត្រូវក្រសោបដោយស្រទាប់ទឹកកកអមតៈបុព្វកាលនៅភ្នំ Mammoth ចំណុះសាធារណៈរដ្ឋ Sakha ឬ នៅបានហៅថា Yakutia។ នេះជាតំបន់ធំបំផុតនៅស៊ីប៊ីរី ។ ស្រទាប់ទឹកកកអមតៈ ក្រសោបយកមេរោគនេះ ត្រូវបានអ្នកវិទ្យាសាស្ត្រប៉ាន់ស្មានថា វាមានអាយុកាលប្រមាណ ៣,៥ លានឆ្នាំ។
ប្រភេទមេរោគស្រដៀងគ្នានេះ ក៏ត្រូវបានអ្នកវិទ្យាសាស្ត្រស៊ីប៊ីរីម្នាក់ទៀតឈ្មោះ Vladimir Repin រកឃើញក្នុងខួរក្បាលនៃដំរីម៉ាមូតរោមក្រាស់ ត្រូវផុតពូជទៅហើយ តែវាបានស្រទាប់ទឹកកកថែរក្សាទុក។
បណ្ឌិត Brouchkov ពោលថាៈ "យើងខ្ញុំបានអនុវត្តការពិសោធន៍យ៉ាងច្រើន លើសត្វកណ្តុរ និងរុយ ហើយបានរកឃើញឥទ្ធិពលនៃមេរោគនេះនៅលើអាយុ និងសមត្ថភាពបន្តពូជរបស់វា។ ប៉ុន្តែ យើងខ្ញុំពុំទាន់ដឹងពិតប្រាកដពីយន្តការសកម្មភាពរបស់ប្រភេទមេរោគនេះ"។
មេរោគ Bacillus F រកឃើញមុននេះ ៦ ឆ្នាំ ក្នុងស្រទាប់ទឹកកកអមតៈបុព្វកាល នារដ្ឋ Sakha -រុស្ស៊ី
បណ្ឌិតផ្នែកមេរោគរាតត្បាតវិទ្យា Vikto Chernyavsky ឲ្យដឹងថា "បណ្តាមេរោគ បានសាយភាយនូវសារធាតុជីវសាស្ត្រពេញ១ជីវិតរបស់វា។ បណ្តាសារធាតុទាំងនោះ បានរំញោចស្ថានភាពនៃអង្គបដិបក្ខរបស់សត្វ ដែលយកមពិសោធន៍"។ លោកពោលបន្ត "នាថ្ងៃអនាគត មេរោគទាំងនេះ អាចកែសម្រួលសុខភាពរបស់មនុស្ស ហើយនាំផ្លូវយើងទៅរកប្រភេទឱសថអមតៈ"។
បណ្ឌិត Brouchkov ឲ្យដឹងបន្ថែមថាៈ "យើងចង់យល់ច្បាស់ពីយន្តការការពារបណ្តាសំណុំហ្សែន និងបណ្តាមុខងាររបស់ហ្សែន"។
"សំណួរសំខាន់បំផុត គឺប្រការអ្វី ដែលផ្តល់ឋាមពលជីវិតសម្រាប់មេរោគ Bacillus F ? វាពិតជាស្មុគស្មាញណាស់។ ប៉ុន្តែ ខ្ញុំអាចនិយាយបានថា លើពិភពលោកនេះ នៅមានមេរោគអមតៈ ជីវិតអមតៈ"។ វាពុំអាចស្លាប់ ឬ ថា វាអាចស្វ័យការពារជីវិតបាន។ កោសិកាមនុស្សពុំអាចស្វ័យការពារខ្លួនបានពីការរងរបួសឡើយ។ ពិតជាអស្ចារ្យណាស់ ព្រោះតាមរយៈវា យើងអាចរកឃើញយន្តការប្រឆាំងនឹងភាពចំណាស់បាន៕
អ្នកវិទ្យាសាស្ត្ររុស្ស៊ីបានរកឃើញមេរោគ "អមតៈ" មានអាយុកាលប្រមាណ ៣,៥លានឆ្នាំ
រូបភាព១របស់ Bacillus F ក្នុងបំពង់ពិសោធន៍