រឿងដ៏អាថ៌កំបាំងបំផុតចំនួន ៩ នៅជុំវិញពិភពលោក ដែលគ្មានអ្នកណាអាចបកស្រាយបានរហូតមកដល់បច្ចុប្បន្ននេះ
នៅលើពិភពលោកយើងនេះមានរឿងចម្លែកៗជាច្រើនដែលមនុស្សយើងមិនអាចដឹង ហើយវាស្ថិតនៅក្នុងភាពអាថ៌កំបាំងរហូតមកដល់បច្ចុប្បន្ននេះ។ ក្នុងចំណោមរឿងដ៏អាថ៌កំបាំងទាំងនោះ TheBNEWS សូមបង្ហាញប្រិយមិត្តនូវរឿងដ៏អាថ៌កំបាំងបំផុតចំនួន ៩ ជុំវិញពិភពលោកដែលមានជាបន្តបន្ទាប់ដូចខាងក្រោមនេះ៖
១) ភ្លៀងពណ៌ក្រហម ( Red Rain)
កាលពីឆ្នាំ ២០០១ គឺមានភ្លៀងពណ៌ក្រហមដ៏ធំមួយបានធ្លាក់នៅរដ្ឋ Kerala នៃភាគខាងជើងប្រទេសឥណ្ឌាពីខែកក្កដា ដល់ខែ កញ្ញា។ សារព័ត៌មាន រដ្ឋាភិបាលឥណ្ឌា និងអ្នកស្រាវជ្រាវមួយចំនួនបានបញ្ចេញមតិផ្សេងៗគ្នាដែលជាហេតុធ្វើឲ្យរឿងនេះក្លាយទៅជាអាថ៌កំបាំងជារៀងរហូតគ្មានអ្នកណាបកស្រាយបានពីមូលហេតុរបស់វាឲ្យពិតប្រាកដ។
២) អណ្ដាតភ្លើងឆាបឆេះខ្លួននារីម្នាក់ដោយគ្មានមូលហេតុ (Spontaneous Combustion)
Jeannie Saffin បានស្លាប់ដោយអណ្ដាតភ្លើងឆាបឆេះរោលពេញខ្លួនរបស់នាងដោយគ្មានមូលហេតុកាលពីថ្ងៃទី ១៥ ខែកញ្ញា ឆ្នាំ ១៩៨២ នៅប្រទេសអង់គ្លេស។ ឪពុករបស់នាងបាននិយាយថា នៅក្នុងថ្ងៃកើតហេតុ គាត់បានឃើញអណ្ដាតភ្លើងដ៏ចម្លែកមួយមានរាងជាដៃមនុស្សហោះទៅដុតកូនស្រីរបស់លោក។
ភាពអាថ៌កំបាំងត្រង់ថា កូនស្រីរបស់លោកអត់មានស្រែក យំ ហើយសូម្បីតែរើបម្រាស់ក៏គ្មានដែរនៅពេលភ្លើងឆេះ ហើយភ្លើងនោះក៏មិនបានឆេះលំនៅឋានរបស់លោកនោះដែរ លើកលែងតែខ្លួនប្រាណកូនស្រីរបស់លោក។ ទោះបីជាមានការស៊ើបអង្កេតពីប៉ូលិស មូលហេតុពិតប្រាកដនៅតែបន្តជាភាពអាថ៌កំបាំងដដែល។
៣) ការបាត់ខ្លួនរបស់អតីតនាយករដ្ឋមន្ត្រីអូស្ត្រាលី (Harold Disappearance)
ការបាត់ខ្លួនរបស់អតីតនាយករដ្ឋមន្ត្រីអូស្ត្រាលី លោក Harold Hold កាលពីថ្ងៃទី ១៧ ធ្នូ ឆ្នាំ ១៩៦៧ នៅតែស្ថិតនៅក្នុងភាពអាថ៌កំបាំងដដែល ខណៈដែលលោកទៅហែលទឹកនៅឆ្នេរ Chiviot Beach។ លោកបានបាត់ខ្លួនភ្លាមៗ បើទោះបីជាមានការុករកពីកងកម្លាំងកងទ័ពជើងទឹក ក្រុមអ្នករុករក និង ជំនួយពីកងទ័ពជើងអាកាសដែលហោះក្រវែលនៅតំបន់បាត់ខ្លួននោះ នៅតែមិនឃើញដដែល ហើយនៅទីបំផុត ករណីនេះបានក្លាយទៅជារឿងដ៏អាថ៌កំបាំងរហូតមកដល់សព្វថ្ងៃនេះ។
៤) សាកសពមនុស្សស្រីសម័យបុរាណ (Lady Dais)
អ្នកវិទ្យាសាស្ត្របានរកឃើញសាកសពមនុស្សស្រីសម័យបុរាណមួយដែលមានអាយុប្រហែល ២ ០០០ ឆ្នាំនៅក្នុងប្រទេសចិន។ នាងបានស្លាប់នៅអំឡុងចន្លោះឆ្នាំ ១៧៨ ទៅ ១៤៥ មុនគ្រិស្តសករាជទំនងដោយសារជំងឺគាំងបេះដូង។ សាកសពនេះត្រូវបានរក្សាទុកជាមួយសារធាតុរាវម្យ៉ាងយ៉ាងអាថ៌កំបាំង ដែលអ្នកវិទ្យាសាស្ត្រមិនអាសន្និដ្ឋានថាជាសារធាតុអ្វីនោះទេ។
៥) ការស្លាប់ដោយសារការរាំឥតឈប់ (Dancing Plague)
នៅក្នុងខែកក្កដា ១៥១៨ ស្ត្រីម្នាក់ឈ្មោះ Frau Troffea ព្រមទាំងមនុស្ស ៤០០នាក់ផ្សេងទៀតបានរាំនៅលើផ្លូវ Strasbourg ភាគខាងជើងប្រទេសបារាំងដោយមិនខ្វល់ពីអ្វីទាំងអស់ និង រាំអស់រយៈពេលមួយខែដោយមិនបានដេកពួន ឬ សម្រាកអ្វីទាំងអស់។ នៅទីបំផុតពួកគេ បានបាត់បង់ជីវិតនៅនឹងកន្លែងខ្លះស្លាប់ដោយសារគាំងបេះដូង ខ្លះស្លាប់ដោយសារដាច់សរសៃឈាមខួរក្បាល និង ខ្លះទៀតស្លាប់ដោយសារអស់កម្លាំង ។ នេះគឺជារឿងមួយដែរមិនមានអ្នកណាម្នាក់ដឹងពីមូលហេតុពិតប្រាកដដែលធ្វើឲ្យអ្នកទាំងនេះរាំឥតឈប់រហូតដល់ស្លាប់នោះឡើយ។
៦) ដុំថ្មចេះកិល (Sailing Stones)
ដុំថ្មនៅតំបន់ Racetrack Playa រដ្ឋ California អាចរំកិលខ្លួនប្តូរទីតាំងដោយខ្លួនឯងមិនចាំបាច់មានសកម្មភាពរបស់មនុស្ស ឬសត្វទៅប៉ះវាឡើយ ហើយបន្សល់ទុកដានផ្លូវរបស់វាយ៉ាងវែងអន្លាយ។ អ្នកវិទ្យាសាស្ត្រខ្លះអះអាងថា ខ្យល់ខ្លាំងដែលបកមកប៉ះវា បានធ្វើឲ្យវាធ្វើចលនារំកិលខ្លួន តែអ្នកខ្លះបានបដិសេធន៍ទៅនឹងការបកស្រាយនេះ ត្បិតអីថ្មមានទម្ងន់ធ្ងន់ ហើយខ្យល់មិនអាចធ្វើឲ្យថ្មកិលបាននោះទេ។ ដូចនេះហើយទើបគេចាត់ទុកថា ករណីនេះគឺជារឿងដ៏អស្ចារ្យ និង ចម្លែកផង ដែលស្ថិតនៅភាពអាថ៌កំបាំងមកដល់សព្វថ្ងៃ។
អ្នកវិទ្យាសាស្ត្រមិនអាចពន្យល់ថាហេតុអ្នីបានជាមានរូបភាពរបស់បុរសម្នាក់នៅក្រុង Turin ភាគខាងជើងប្រទេសអ៊ីតាលីដែលបានស្លាប់ដោយការឆ្កាងធ្វើទារុណកម្មនោះ មានវត្តមាននៅលើក្រណាត់សូត្រមួយនេះ។ កាលពីឆ្នាំ ១៨៩៨ គេបានធ្វើការវិភាគម្ដងហើយដែរ ប៉ុន្តែនៅតែមិនអាចរកមូលហេតុឃើញ។ អ្នកខ្លះបានអះអាងថា រូបភាពនោះជារូបភាពរបស់យេស៊ូគ្រិស្តដែលព្រះអង្គធ្លាប់សោយទិវង្គតដោយសារការយកទៅឆ្កាងនេះដែរ។ ផ្ទុយទៅវិញគ្រីស្តបរិស័ទបានអះអាងថា វាគឺជាក្រណាត់បញ្ចុះសពរបស់ព្រះយេស៊ូគ្រិស្តទៅវិញ។ ទោះបីជាបែបនេះក្តី វានៅតែជារឿងដ៏អាថ៌កំបាំងដដែលគ្មានចម្លើយពិតប្រាកដណាមួយយកជាការបាននោះឡើយ។
៨) សំឡេងដ៏ចម្លែកឮឡើងនៅរដ្ឋ New Mexico (Taos Hum)
សំឡេងដ៏ចម្លែក (Taos Hum) នៅតែបន្តភាពអាថ៌កំបាំងរហូតមកដល់បច្ចុប្បន្ននេះ បន្ទាប់ពីសំឡេងនេះបានបន្លឺឡើងនៅដើមទសវត្សទី ៩០ ក្នុងក្រុង Taos ភាគកណ្ដាលរដ្ឋ New Mexicoសហរដ្ឋអាមេរិក។ សំឡេងល្វើយៗហាក់បីដូចជាសំឡេងម៉ាស៊ីនម៉ាស៊ូតពីចម្ងាយលាន់ឮឡើងឥតដាច់ធ្វើឲ្យប្រជាជនធុញថប់ក្នុងអារម្មណ៍។ ទោះបីជាមានការស្រាវជ្រាវយ៉ាងណាក្តី គេនៅតែមិនទាន់ដឹងពីប្រភពច្បាស់លាស់ពីសំឡេងនេះនៅឡើយទេរហូតមកដល់ពេលនេះ។
៩) ដុំថ្ម Grooved Spheres
មានថ្មមួយនៅក្នុងប្រទេសអាហ្វ្រិកខាងត្បូងដែលគេស្គាល់ថាជា Precambrian ដែលមានអាយុកាលប្រមាណ២,៨ ពាន់លានឆ្នាំ។ អ្វីដែលនៅតែជាអាថ៌កំបាំងនោះគឺគេមិនដឹងថាវាជាអ្វី សម្រាប់ធ្វើអ្វី ហើយមកពីណានោះទេ ទើបមានវត្តមាននៅលើភពផែនដីយើងនេះ៕
ប្រែសម្រួល៖ សុខ វាសនា
ប្រភព៖ wonderslist