យន្តហោះជប៉ុនចុះចតជាបន្ទាន់ បន្ទាប់ពី​ម៉ាស៊ីនមួយរលត់ ខណៈកំពុងហោះហើរនៅលើអាកាស

យន្តហោះរបស់​ក្រុមហ៊ុនអាកាសចរណ៍ជប៉ុន មានផ្ទុកអ្នក​ដំណើរ ២២៨នាក់ បាន​បង្ខំចិត្តវិលត្រឡប់ ទៅកន្លែងដើមវិញ ហើយចុះចតជាបន្ទាន់ នៅថ្ងៃពុធនេះ បន្ទាប់ពី​ម៉ាស៊ីន​យន្តហោះ ផ្នែកខាងស្តាំ បានរលត់ក្នុងពេលកំពុង​ហោះហើរ ទៅកាន់​កោះ Hokkaido ស្ថិតនៅភាគខាងជើង ប្រទេសជប៉ុន​ នេះបើយោងតាម​អ្នកនាំពាក្យ​ផ្នែកអាកាសចរណ៍ ដកស្រង់ដោយសារព័ត៌មាន Channel News Asia នៅថ្ងៃទី០៨ ខែមេសានេះ។ យន្តហោះ Boeing 777 ដើរដោយម៉ាស៊ី Pratt &Whitney បានចុះចតដោយសុវត្ថិភាពនៅ អាកាសយាន្តដ្ឋាន Haneda ក្នុងទីក្រុងតូក្យូ ខណៈមូលហេតុនៃ​ការ​រលត់ម៉ាស៊ីន មិនទាន់អាចបញ្ជាក់បាននៅឡើយ៕