ក្រុមជម្រើសជាតិកម្ពុជាអាយុក្រោម ២២ ឆ្នាំ បានលត់ក្រុមជម្រើសជាតិហ្វីលីពីនអាយុក្រោម២២ឆ្នាំ ក្នុងលទ្ធផល ៣-១ នៅល្ងាចថ្ងៃអង្គារនេះ ដើម្បីបំបែកកំណត់ត្រាមិនដែលឈ្នះរបស់ខ្លួន នៅក្នុងការប្រកួតជម្រុះប្រចាំពូលG នៃពានរង្វាន់ AFC U-23 Championship 2016 ដែលធ្វើនៅកីឡដ្ឋាន Rajamangala Stadium ទីក្រុងបាងកក ប្រទេសថៃ។
បើទោះបីជាការឈ្នះនេះវាយឺតពេលចំពោះ U22 កម្ពុជា ក្នុងការទទួលបានឱកាសទៅវគ្គបន្ត ព្រោះបានចាញ់ក្រុមម្ចាស់ផ្ទះថៃដ៏គួរឲ្យសោកស្តាយ ២-១ ក្នុងការប្រកួតបើកឆាក និងបន្តចាញ់ក្រុម U22 កូរ៉េខាងជើង ៤-១ នាការប្រកួតជម្រុះលើកទី ២ ប៉ុន្តែការឈ្នះ U22 ហ្វីលីពីន ៣-១ ក្នុងការប្រកួតបង្រ្គប់កិច្ចលើកទី៣ចុងក្រោយ នេះវាជាលទ្ធផលដ៏ល្អ ដើម្បីលួងលោមដល់អ្នកទស្សនាជាជនរួមជាតិ ដែលបានខំតាមដាន និងលើកទឹកចិត្តរហូតមក ពិសេសជួយឲ្យជម្រើសជាតិកម្ពុជា គេចផុតពីពាក្យនិយាយបែបរិះគន់ថា «ស្ពាយតែបទពិសោធត្រឡប់មកផ្ទះវិញ»។
បន្ថែមលើនេះ ការឈ្នះលើកនេះក៏បានលប់បំបាត់នូវការបរាជ័យយ៉ាងអាម៉ាស់ក្រោម ថ្វីជើងជម្រើសជាតិហ្វីលីពីន ក្នុងលទ្ធផល ៨-០ នាការប្រកួតជម្រុះពានរង្វាន់ AFC Challeng Cup 2014 នៅលើទឹកដីហ្វីលីពីន កាលពីថ្ងៃ២៤ ខែមីនា ឆ្នាំ២០១៣ ផងដែរ ជាពិសេសក្រុម U22 កម្ពុជា ទទួលបានប្រាក់លើកទឹកចិត្តចំនួន ១ ម៉ឺនដុល្លារពីសហព័ន្ធកីឡាបាល់ទាត់កម្ពុជា ពេលពួកគេវិលត្រឡប់មកដល់មាតុប្រទេសវិញ។
នៅក្នុងការប្រកួតបង្រ្កប់កិច្ច ជាមួយក្រុមមិនដែលស្គាល់រសជាតិឈ្នះដូចគ្នា ហ្វីលីពីន នៅថ្ងៃអង្គារនេះ លោក Lee Tae Hoon គ្រូបង្វឹកជម្រើសជាតិកម្ពុជា មិនបានប្រើយុទ្ធសាស្រ្តលេងបែបទប់ដូចពេលកម្ពុជាចាញ់ថៃ និងកូរ៉េខាងជើង នោះទេ គឺលោកផ្លាស់ប្តូរទម្រង់លេងបែបវាយលុកវិញម្តង ហើយខ្សែប្រយុទ្ធវ័យក្មេង ចាន់ វឌ្ឍនាកា ដែលធ្លាប់រកបាន ២ គ្រាប់ ដើម្បីជួយឲ្យក្រុមជម្រើសជាតិកម្ពុជា ឈ្នះក្រុមជម្រើសជាតិម៉ាកាវ ៣-០ ក្នុងការប្រកួតជម្រុះជាបឋមជើងទី ១ ប្រចាំទ្វីបអាស៊ី នៃពានរង្វាន់បាល់ទាត់ពិភពលោក FIFA World Cup Russia 2018 នៅពហុកីឡដ្ឋានស្តាតចាស់ កាលពីថ្ងៃទី ១២ ខែមីនា ឆ្នាំ ២០១៥ កន្លងមកនេះរកបាន ២ គ្រាប់តែម្នាក់ឯង។
គ្រាប់បាល់ទី ១ របស់ ចាន់ វឌ្ឍនាកា បានកើតមានឡើងនៅនាទីទី ៥ តាមរយៈការទាត់បាល់ហ្វ្រីឃីតយ៉ាងល្អរបស់គេ ហើយនៅនាទីទី ១០ វឌ្ឍនាកា បានអូសបាល់ចូលតំបន់គ្រោះថ្នាក់របស់ហ្វីលីពីន យ៉ាងលឿន រួចបានទាត់បញ្ជូលទីបានយ៉ាងល្អបំផុត។ បន្ថែមលើនេះការទាត់បាល់ជ្រុងបានយ៉ាងល្អរបស់គេ បានជួយឲ្យខ្សែការពារ សឿយ វិសាល តែតបាល់បញ្ចូលទីបាន១គ្រាប់ទៀត នៅនាទីទី ១៦ ដើម្បីជួយឲ្យកម្ពុជា នាំមុខហ្វីលីពីន ៣-០ នៅតង់ទី១។
យ៉ាងណាមិញ សម្រាប់ការប្រកួតនៅតង់ទី២ កម្ពុជា បានគ្រប់គ្រងបានយ៉ាងច្រើន ប៉ុន្តែក្រុមមួយនេះមិនបានរកគ្រាប់បាល់បន្ថែមនោះឡើយ។ ផ្ទុយទៅវិញការធ្វេសប្រហែសនៅតំបន់ការពារ ក្នុងការប្រកួតម៉ោងបន្ថែម ៩០+៣ បានធ្វើឲ្យខ្សែប្រយុទ្ធទើបដាក់ឲ្យចូលលេង Arboleda Fitch អូសបាល់ដាច់តែឯង រួចបានស៊ុតបាល់ផុតដៃអ្នកចាំទី អ៊ុំ សេរីរ័ត្ន បញ្ចូលទីបានយ៉ាងល្អ ដើម្បីជួយឲ្យហ្វីលីពីន បំបែកពងមាន់ និងចាញ់ក្រុមកម្ពុជា ក្នុងលទ្ធផល ៣-១៕
ប្រភព Postkhmer