Skip to main content
កុំស្លាប់ដូចពស់ កុំរស់ដូចកង្កែប កុំអែបដូចជ្រៃ កុំអាស្រ័យដូចបញ្ញើ
១/ កុំស្លាប់ដូចពស់ៈ មានន័យថា សត្វពស់ជាសត្វអាសិរពិស កាចសាហាវដែលមនុស្សផងទាំងឡាយខ្លាចញញើត មិនចង់ជួប មិនចង់នៅក្បែរ កាលណាស្លាប់ទៅមនុស្សផងទាំងឡាយ គ្មានស្តាយស្រណោះ មានតែពោលពាក្យសាទរ សាធុ សាធុ។ក្នុងន័យនោះបើនិយាយពីមនុស្សចង់មានន័យថា មនុស្សយើងរស់នៅក្នុងសង្គម កុំបង្កភាពចលាចរ ភាពហ្វឹកហ្វ និងបង្កបញ្ហាដល់អ្នកដទៃ។
២/ កុំរស់ដូចកង្កែបៈ មានន័យថា កង្កែបជាសត្វមួយប្រភេទ ដែលមិនចេះធ្វើជំរកដោយខ្លួនឯង តែងតែទៅស្នាក់អាស្រ័យជាមួយគេ ហើយជាសត្វដែលតែងតែបង្ករ និងនាំទុកទោសដល់សត្វដទៃ។ ក្នុងន័យនេះដែរ បើយើងនិយាយពីមនុស្សគេចង់បានន័យថា បើយើងជាមនុស្ស កុំរស់នៅដូចសត្វកង្កែប យើងកុំនាំទុកទោសដល់អ្នកដទៃ កុំបង្កបញ្ហាដល់អ្នកដទៃ ត្រូវចងចាំថា បើយើងទៅរស់នៅកន្លែងណាមួយ បើមិនបានផ្តល់ផលប្រយោជន៍ដល់អ្នកដទៃ សូមកុំផ្តល់ភាពលំបាក ឬទុកទោសដល់អ្នកដទៃ។
៣/ កុំអែបដូចជ្រៃៈ មានន័យថា ជ្រៃជារុក្ខជាតិម្យ៉ាង ដែលរស់នៅដោយពឹងផ្អែក និងអែបទៅលើគេ និងជញ្ជក់ជាតិពីគេ ដើម្បីចិញ្ចឹមជីវិតរបស់ខ្លួន។ ក្នុងន័យនេះ បើយើងនិយាយពីមនុស្ស គេចង់មានន័យថា យើងជាមនុស្សកុំរស់នៅដោយគ្រាន់តែកំដរគេ កុំកឹបគេងបឺតជញ្ជក់អ្នកដទៃ ដើម្បីតែផលប្រយោជន៍របស់ខ្លួន។
៤/ កុំអាស្រ័យដូចបញ្ញើក្អែកៈ មានន័យថា បញ្ញើក្អែកជាប្រភេទរុក្ខជាតិម្យ៉ាង ដែលរស់នៅដោយពឹងផ្អែកទៅលើគេទាំងស្រុង បើគេស្លាប់វាក៏ស្លាប់។ ក្នុងន័យនោះ បើយើងនិយាយពីមនុស្សចង់មានន័យថា មនុស្សយើងកើតមកកុំរស់នៅដោយពឹងផ្អែកទៅលើគេទាំងស្រុងពេក ត្រូវមានអ្វីមួយជាជំហរសំរាប់ខ្លួនឯង។
