គណៈកម្មាធិការជាតិរៀបចំការបោះឆ្នោត ហៅកាត់ថា គជប គ្រោងនឹងដាក់សំណើរទៅកាន់រដ្ឋាភិបាលកម្ពុជា ដើម្បីស្នើសុំកែរប្រែខ្លឹមសារនៃអនុក្រឹត្រលេខ៦០ ចុះកាលបរិច្ឆេទឆ្នាំ២០០៧ ដែលបានកំណត់ថា បុគ្គលកំពុងបំពេញបុព្វជិតក្នុងព្រះពុទ្ធសាសនានឹងមិនត្រូវផ្តល់អត្តសញ្ញាណប័ណ្ណសញ្ជាតិខ្មែរនោះទេ។ បើតាម គជប បើព្រះសង្ឃមិនមានអត្តសញ្ញាណប័ណ្ណសញ្ជាតិខ្មែរ នោះមានន័យថា ព្រះសង្ឃនឹងអាចចុះឈ្មោះបោះឆ្នោតតាមច្បាប់ថ្មីបាននោះទេ។
សំណើរនេះ គ្រោងនឹងបញ្ជូនទៅកាន់រដ្ឋាភិបាលនៅពេលឆាប់ៗខាងមុខនេះ បន្ទាប់ពីគណៈកម្មាធិការជាតិរៀបចំការបោះឆ្នោត ហៅកាត់ថា(គ.ជ.ប)បានជួបប្រជុំគ្នា កាលពីថ្ងៃទី១៧កញ្ញា កន្លងទៅ ដោយបានបង្ហាញការព្រួយបារម្ភថា បុព្វជិតក្នុងព្រះពុទ្ធសាសនា ព្រះសង្ឃ នឹងមិនអាចចុះឈ្មោះបោះឆ្នោតបាននោះទេ បើយោងតាមច្បាប់បោះឆ្នោតថ្មី។
បើយោងតាមច្បាប់ស្តីពីការបោះឆ្នោតជ្រើសតាំងតំណាងរាស្ត្រថ្មីនៅត្រង់ជំពូក៦ ដែលបានចែងពីការចុះឈ្មោះបោះឆ្នោត និងបញ្ជីបោះឆ្នោតត្រង់មាត្រា៥១បានចែងអំពីការចុះឈ្មោះបោះឆ្នោត ដោយប្រើប្រាស់តែអត្តសញ្ញាណប័ណ្ណសញ្ជាតិខ្មែរតែមួយគត់។ ប៉ុន្តែផ្ទុយពីនេះ នៅក្នុងខ្លឹមសារនៃអនុក្រឹត្រលេខ៦០ ចុះកាលបរិច្ឆេទថ្ងៃទី១២ខែមិថុនាឆ្នាំ២០០៧ បានចែងថា បុគ្គលទាំងឡាយណាដែលស្ថិតនៅក្នុងភេទជាបុព្វជិតនៅក្នុងវិស័យព្រះពុទ្ធសាសនា នឹងមិនត្រូវបានផ្តល់អត្តសញ្ញាណប័ណ្ណសញ្ជាតិខ្មែរនោះទេ។
បើតាមលោក គួយ ប៊ុនរឿន អនុប្រធានគណៈកម្មាធិការជាតិរៀបចំការបោះឆ្នោត បើព្រះសង្ឃមិនមានអត្តសញ្ញាណប័ណ្ណសញ្ជាតិខ្មែរទេ នោះមានន័យថា ព្រះសង្ឃនៅទូទាំងប្រទេសជាង៥ទៅ៧ម៉ឺនអង្គ នឹងមិនអាចចុះឈ្មោះបោះឆ្នោតឡើយ។ ប្រឈមនឹងករណីនេះ លោក គួយ ប៊ុនរឿន បានបញ្ជាក់ថា គជប នឹងស្នើសុំទៅរដ្ឋាភិបាលដើម្បីកែរប្រែខ្លឹមសារនៃអនុក្រឹត្រលេខ៦០នេះ ដើម្បីបើកផ្លូវឲ្យព្រះសង្ឃអាចធ្វើអត្តសញ្ញាណប័ណ្ណ និងអាចចុះឈ្មោះបោះឆ្នោតបាន ព្រោះថា ព្រះសង្ឃក៏ជាប្រជាពលរដ្ឋខ្មែរផងដែរ។
លោក ម៉ៅ ច័ន្ទតារា អគ្គនាយកនៃអគ្គនាយកដ្ឋានអត្ដសញ្ញាណកម្មក្រសួងមហាផ្ទៃ មិនអត្ថាធិប្បាយចំពោះសំណើរសុំកែរប្រែខ្លឹមសារនៃអនុក្រឹត្រលេខ៦០នេះទេ ព្រោះថា វាហួសពីសមត្ថកិច្ចរបស់លោក។ លោកបានបញ្ជាក់ថា ក្រសួងនៅតែបន្តអនុវត្តទៅតាមខ្លឹមសានៃអនុក្រឹត្រ នេះ ប្រសិនបើមិនមានការកែរប្រែ។ បើតាមលោក ម៉ៅ ច័ន្ទតារា គិតមកដល់ពេលនេះ ក្រសួងមហាផ្ទៃបានធ្វើអត្តសញ្ញាណប័ណ្ណសញ្ជាតិខ្មែរជូនដល់ប្រជាពលរដ្ឋកម្ពុជាចំនួន៥លាន៥សែននាក់ រួចហើយ ក្នុងចំណោមប្រជាពលរដ្ឋខ្មែរគ្រប់អាយុប្រមាណជាង១០លាននាក់៕ KHMER RFI
